Orolni tiklash uchun Sibir suvlarini yo‘naltirish taklif qilindi
Rossiya ilmiy doiralari Orol dengizini tiklash masalasini yana muhokama qilishni boshladi. Bu haqda Zamin.uz xabar berdi.
Bu safar Sibir daryolaridan O‘zbekiston va Qozog‘iston hududlariga suv yo‘naltirish loyihasi taklif etilmoqda. Rossiya Fanlar akademiyasi Suv muammolari instituti direktori Viktor Danilov-Danilyanning ma’lum qilishicha, loyiha oktabr oyida o‘tgan “Quruqlik suv resurslari” ilmiy kengashi yig‘ilishida ko‘rib chiqilgan.
Mutaxassislarning fikriga ko‘ra, Sibir daryolarining bir qismini O‘zbekiston va Qozog‘iston chegarasidagi qurigan Orol dengizi havzasiga yo‘naltirish mumkin. Ushbu tashabbus Markaziy Osiyo mintaqasida suv taqchilligini kamaytirish va ekologik muvozanatni tiklashga qaratilgan.
Bundan tashqari, Pechora va Severnaya Dvina daryolarining suvini Volga havzasi orqali Priazovye hududiga yo‘naltirish g‘oyasi ham ilgari surilmoqda. Viktor Danilov-Danilyan ushbu loyihalar Rossiyaning suv resurslari siyosatini shakllantirish va ularni qayta taqsimlash imkoniyatlarini o‘rganishga xizmat qilishini ta’kidladi.
Ushbu masalalar Rossiyada ekologik barqarorlikni ta’minlash va mintaqaviy suv muammolarini hal etishga qaratilgan yirik tashabbus sifatida ko‘rilmoqda. Mazkur loyiha mintaqaviy hamkorlik va suv resurslaridan oqilona foydalanish masalasini yanada dolzarb qiladi.
