Britaniya Afrikaning uch davlatiga viza cheklashi mumkin
Birlashgan Qirollik Afrikaning uch davlati — Angola, Namibiya va Kongo Demokratik Respublikasi fuqarolariga viza berishni to‘xtatishi mumkin. Bu haqda Zamin.uz xabar berdi.
Bu haqda The Times nashri Britaniya Ichki ishlar vazirligidagi manbalarga asoslanib xabar berdi. Ushbu qarorning asosiy sababi mazkur davlatlarning fuqarolarini qaytarib olishdan bosh tortishi bilan bog‘liq.
Ma’lum bo‘lishicha, so‘nggi yillarda Buyuk Britaniyaga noqonuniy ravishda kirgan 4 mingga yaqin fuqaro deportatsiya qilinishi kerak edi. Ammo ushbu mamlakatlar rasmiy London bilan hamkorlik qilishni rad etgan.
Bu esa Britaniya hukumatining noroziligiga sabab bo‘lgan. Britaniya Ichki ishlar vazirligi 13-noyabr kuni ushbu mamlakatlarning Londondagi elchixonalariga ogohlantirish yuborgan.
Ogohlantirishga ko‘ra, agar bir oy ichida deportatsiya masalasida faol hamkorlik boshlanmasa, viza cheklovlari joriy etiladi. Dastlab, bu choralar diplomatik xodimlar va imtiyozli shaxslar uchun tezkor viza olish imkoniyatini bekor qilish shaklida amalga oshiriladi.
Bundan buyon ular oddiy tartibda murojaat qilib, navbat kutishlariga to‘g‘ri keladi. Keyingi bosqichda esa ushbu davlatlar fuqarolariga to‘liq viza taqiqi qo‘yilishi ham ehtimoldan xoli emas.
Ushbu chora AQShning Tramp ma’muriyati davridagi viza siyosatini eslatadi. Manbalarga ko‘ra, bu jarayon faqatgina Afrika davlatlari bilan cheklanib qolmasligi mumkin.
Kelgusida Hindiston, Pokiston, Nigeriya, Bangladesh, Somali va Gabon kabi o‘z fuqarolarini qaytarishni istamaydigan davlatlar ham “qora ro‘yxat”ga kiritilishi ehtimoli mavjud.
