Zelenskiy va Makron Ukraina mudofaasi bo‘yicha kelishuv imzoladi

Ukraina prezidenti Volodimir Zelenskiy Fransiyaga rasmiy tashrif uyushtirib, Fransiya prezidenti Emmanuel Makron bilan uchrashuv o‘tkazdi. Bu haqda Zamin.uz xabar berdi.

Uchrashuv davomida Parij yaqinidagi Villakuble aviabazasida tomonlar mudofaa sohasida keng qamrovli hamkorlik deklaratsiyasini imzoladi. Zelenskiy bu kelishuvni «tarixiy qadam» deb atadi.

Hujjat Ukraina armiyasi uchun strategik ahamiyatga ega bo‘lgan yirik qarorlarni o‘z ichiga oladi. Bitimning asosiy qismi Fransiyada ishlab chiqarilgan 100 dona Rafale qiruvchi samolyotlarini Ukrainaga yetkazib berish rejasidir.

Bu harbiy yordamning moliyaviy manbalari hozircha to‘liq oshkor qilinmagan. Xalqaro manbalarga ko‘ra, samolyotlarning bir qismi Fransiyaning hozirgi harbiy parkidan olinishi mumkin.

Shuningdek, tomonlar SAMP/T havo mudofaa tizimlari, zamonaviy radarlar, «havo-havo» moslamalari va boshqa texnikalarni yetkazib berish bo‘yicha kelishuvga erishdi. Bundan tashqari, Ukraina va Fransiya tutib oluvchi dronlar ishlab chiqarishni birgalikda yo‘lga qo‘yishga kelishib oldi.

Bu qadam Ukraina mudofaa tizimini yanada mustahkamlash va zamonaviylashtirishga xizmat qiladi. Kelishuvdan so‘ng Zelenskiy va Makron «ko‘ngillilar koalitsiyasi» shtab-kvartirasiga tashrif buyurib, Ukrainaga ko‘rsatilayotgan yordamni muhokama qildi.

Makron Ukraina haqida «Yevropaning birinchi mudofaa chizig‘i» deb ta’kidladi va bu yordam butun qit’a xavfsizligi uchun muhim ekanini qayd etdi. Zelenskiy Fransiyadan keyin Ispaniyaga tashrif buyuradi.

Bu uning urush boshlanganidan beri Ispaniyaga ikkinchi safari bo‘ladi. Shu bilan birga, bir oy oldin Ukraina Shvetsiya bilan ham Gripen qiruvchi samolyotlarini yetkazib berish bo‘yicha kelishuv imzolagan edi.

Mazkur samolyotlarning dastlabki partiyasi 2026-yilda yetib kelishi kutilmoqda. Xalqaro manbalarga ko‘ra, Ukraina Fransiya va Shvetsiya bilan tuzilgan bu kelishuvlar orqali o‘z harbiy aviatsiyasini 250 ta zamonaviy jangovar samolyotga yetkazishni rejalashtirmoqda.

Ayni paytda Ukrainada faqat bir necha o‘nlab samarali samolyot borligini inobatga olsak, bu bitimlar mamlakat mudofaasini sezilarli darajada kuchaytirishi aniq. Parijda imzolangan bu yangi kelishuv Ukraina va Yevropa xavfsizligi uchun muhim qadam bo‘lishi shubhasiz.