Karib va Afrika davlatlari Britaniyadan tovon talab qilmoqda
Karib havzasi va Afrika qit’asidagi bir qator davlatlar Buyuk Britaniyadan qullik va mustamlakachilik davridagi adolatsizliklar uchun javobgarlik talab qilmoqda. Bu haqda Zamin.uz xabar berdi.
"Reuters" axborotiga ko‘ra, Karib hamjamiyati (CARICOM) a’zolari bu masalani muhokama qilish uchun Londonga maxsus delegatsiya yuborishni rejalashtirgan. Delegatsiya Buyuk Britaniya hukumati va parlamenti a’zolari bilan uchrashib, qullik davridagi og‘ir tarixiy adolatsizliklar va ularning bugungi ijtimoiy-iqtisodiy oqibatlarini muhokama qiladi.
CARICOM tomonidan taqdim etilishi kutilayotgan reparatsiya rejasida bir qator talablar ilgari surilgan. Ular orasida to‘liq va rasmiy uzr so‘rash, ta’lim dasturlarini kengaytirish, davlat qarzlarini bekor qilish hamda moliyaviy kompensatsiyalar ajratish masalalari mavjud.
Shuningdek, Afrika Ittifoqiga a’zo ba’zi davlatlar ham Yevropaning XV-XIX asrlardagi qullar savdosi uchun tovon talab qilish ustida ish olib bormoqda. Ma’lumotlarga ko‘ra, o‘sha davrda 12,5 milliondan ortiq afrikalik majburan olib ketilib, qul sifatida sotilgan.
Biroq, reparatsiya masalasida qarshiliklar ham ortib bormoqda. Ayrim Yevropa davlatlari yetakchilari zamonaviy hukumatlar o‘tmishdagi xatolar uchun javobgar bo‘lolmasligini ta’kidlamoqda va bu mavzuda rasmiy qarorlar qabul qilishga shoshilmayapti.
Shu bilan birga, 2025 yilda “The Repair Campaign” buyurtmasi bilan o‘tkazilgan so‘rov natijalariga ko‘ra, britaniyaliklarning 85 foizi mamlakat o‘z tarixida Karib mintaqasiga uch milliondan ortiq afrikalikni majburan ko‘chirganini bilmagan. Bu esa o‘tmishdagi voqealar haqida ma’lumot yetarli emasligini ko‘rsatadi.
