Saudiya: Isroil bilan muloqot uchun Falastin sharti.
Saudiya Arabistoni Isroil bilan diplomatik munosabatlarni tiklash uchun Falastin davlatini rasman tan olishni asosiy shart sifatida ilgari surmoqda. Bu haqda Zamin.uz xabar berdi.
Bu haqda falastinlik rasmiylar ma’lum qilgan. Ularning ta’kidlashicha, Saudiya Arabistoni Isroil bilan munosabatlarni normallashtirish masalasida shoshilmaslikni ma’qul ko‘rmoqda.
Riyodning fikriga ko‘ra, ayni paytda Isroil hukumatini boshqarayotgan Binyamin Netanyaxu va uning o‘ng qanot vakillari, jumladan, Betsalel Smotrich hamda Itamar Ben-Gvirning siyosiy qarashlari tufayli yaqinlashuv imkoniyati juda past. Saudiya Arabistoni Falastin davlatining tashkil etilishini aniq belgilovchi va amaliy qadamlarni o‘z ichiga olgan rejani talab qilmoqda.
Riyod ushbu masalani mintaqadagi barqarorlikning asosiy omili deb hisoblaydi. Shu bilan birga, Isroil BMT Xavfsizlik Kengashining G‘azo bo‘yicha yangi rezolyutsiya loyihasiga nisbatan norozilik bildirmoqda.
Mazkur hujjatda falastinliklarning mustaqil davlat barpo etish huquqini ta’minlashga oid shart-sharoitlarni yaratish ko‘zda tutilgan. Isroilning ayrim yuqori martabali vazirlari bunday davlatning tashkil etilishiga qat’iyan qarshi chiqib, bu hech qachon amalga oshmasligini ta’kidlamoqda.
Yaqin Sharqdagi vaziyat tobora murakkablashayotgan bir paytda, Saudiya Arabistoni va Isroil o‘rtasidagi diplomatik jarayon Falastin masalasi hal qilinishiga chambarchas bog‘liq bo‘lib qolmoqda.
