Britaniya harbiylariga avtomobilda maxfiy suhbat taqiqlandi
Buyuk Britaniya Mudofaa vazirligi harbiy xizmatchilar uchun yangi xavfsizlik qoidalarini joriy qildi. Bu haqda Zamin.uz xabar berdi.
Endilikda harbiy xizmatchilarga o‘z avtomobillarida rasmiy yoki maxfiy mavzularni muhokama qilish qat’iyan taqiqlanadi. Bu haqda Daily Mail nashri xabar berdi.
Mazkur qaror Xitoy tomonidan olib borilishi mumkin bo‘lgan josuslik faoliyati va tinglash qurilmalari orqali ma’lumotlar o‘g‘irlanishi xavfi sababli qabul qilingan. Mutaxassislarning fikricha, ayrim zamonaviy avtomobillar, ayniqsa, Xitoyda ishlab chiqarilgan modellarda mikrofon, kamera va internetga ulangan sensorlar mavjud bo‘lib, ular orqali suhbatlar yozib olinishi yoki uzatilishi xavfi bor.
Britaniya armiyasining xizmat avtomobillarida endilikda maxsus ogohlantiruvchi stikerlar o‘rnatilgan. Ushbu stikerlarda “Avtomobilda rasmiy ma’lumotlarni muhokama qilishdan saqlaning” degan yozuv mavjud.
Ushbu chora harbiy sirlarni himoya qilish va axborot xavfsizligi madaniyatini kuchaytirish maqsadida joriy etilgan. So‘nggi yillarda Britaniya hukumati Xitoy kompaniyalariga nisbatan axborot xavfsizligi choralarini kuchaytirdi.
Masalan, ilgari Huawei kompaniyasining uskunalaridan 5G tarmoqlarida foydalanish cheklangan edi. Bu kabi xavfsizlik choralari mamlakat axborot tizimlarini himoya qilishga qaratilgan.
