Turkistondagi yong‘inda 12 kishi halok bo‘ldi

Qozog‘istonning Turkiston viloyatidagi Alg‘abas qishlog‘ida bugun tongda yuz bergan yong‘in 12 kishining hayotiga zomin bo‘ldi. Bu haqda Zamin.uz xabar berdi.

Halok bo‘lganlar orasida 9 nafar bola borligi ma’lum qilindi. Yong‘in ikki qavatli uyni qamrab olib, juda tez tarqalgan.

Qutqaruvchilar voqea joyidan uch kishini hushsiz holda topib, darhol shifoxonaga yetkazishdi. Ayni paytda ularning ahvoli og‘ir ekani bildirilmoqda.

Qo‘shnilarning aytishicha, kecha uyda tadbir o‘tkazilgan va mehmonlar ko‘p bo‘lgan. Tergov ushbu holatni ham o‘rganmoqda.

Qozog‘iston prezidenti Qosim-Jo‘mart To‘qayev ushbu fojea sababli chuqur qayg‘uda ekanini bildirib, halok bo‘lganlar va jarohatlanganlarning yaqinlariga yordam ko‘rsatishni hukumat va viloyat rahbariyatiga topshirdi. Hozirda yong‘inning kelib chiqish sabablari o‘rganilmoqda.

Bu voqea Alg‘abas aholisi uchun katta musibat bo‘ldi.