AQShda O‘zbekiston fuqarosi, 31 yoshli Axror Bozorov qo‘lga olindi. Bu haqda Zamin.uz xabar berdi.
U O‘zbekistonda terrorchilik tashkilotida ishtirok etganlikda ayblanib, qidiruvga berilgan edi. Bozorov 9-noyabr kuni Kanzas shtatida AQSh immigratsiya va bojxona nazorati (ICE) xodimlari tomonidan hibsga olindi.
Ushbu paytda u yuk mashinasi haydovchisi sifatida faoliyat yuritayotgan edi. O‘zbekiston rasmiylariga ko‘ra, Bozorov internetda jihodga chaqiruvchi materiallarni tarqatgan va terrorchilik guruhlari uchun odam yollashda ayblangan.
Toshkent sudi uning hibsga olinishi uchun 2022 yilda order bergan edi. AQSh huquqni muhofaza qilish organlarining ma’lumotiga ko‘ra, Bozorov 2023 yil fevral oyida AQSh chegarasini noqonuniy ravishda kesib o‘tgan.
Chegara xizmati xodimlari uni ushlagan, ammo keyinchalik qo‘yib yuborilgan. 2024 yilda esa u AQShda ishlash uchun ruxsatnoma olgan va Pensilvaniya shtatida tijoriy haydovchilik guvohnomasini qo‘lga kiritgan.
Hozirda Bozorovning faoliyati bo‘yicha tergov ishlari davom etmoqda.
