Omskda o‘zbekistonlikka 4 yil qamoq jazosi berildi

Omsk sudi O‘zbekiston fuqarosini 4 yil davomida og‘ir rejimli koloniyada qamoq jazosiga hukm qildi. Bu haqda Zamin.uz xabar berdi.

U begona bir kishini kaltaklab, ustiga itni hujum qildirgani uchun aybdor deb topildi. Sudning birinchi instansiya qaroriga ko‘ra, mahkum jabrlanuvchiga ma’naviy zarar yetkazgani uchun deyarli yarim million rubl miqdorida tovon puli to‘lashi lozim.

Biroq hududiy sudga berilgan apellyatsiya va kassatsiya instansiyasiga yozilgan shikoyatlar rad etilib, jazo adolatli deb topildi. Tergov ma’lumotlariga ko‘ra, hodisa 2023-yil 9-iyul kuni Omsk shahridagi bog‘dorchilik uyushmasida sodir bo‘lgan.

36 yoshli O‘zbekiston fuqarosi begona bir kishini tayoq va oyoqlari bilan kaltaklagan. Hujumda dala hovli egasi yollagan ishchi ham ishtirok etgan.

Jabrlanuvchi qochishga uringanida, dala hovli egasi uning ustiga itni tashlagan. Natijada, it jabrlanuvchini kamida yigirma marta tishlab, unga jiddiy jarohatlar yetkazgan, jumladan bosh suyagi sinishi kabi og‘ir tan jarohatlari qayd etilgan.

Ayblanuvchi sudda aybini qisman tan olib, bu harakatlar mulkni o‘g‘irlikdan himoya qilish maqsadida sodir etilganini ta’kidlagan. Biroq sud uning qasddan og‘ir tan jarohati yetkazganini aniqlab, aybdor deb topdi.

Hodisa davomida ishtirok etgan ikkinchi shaxs qochishga muvaffaq bo‘lgan va hozircha javobgarlikka tortilmagan.