Rossiyada o‘zbekistonliklar uchun haydovchilik qoidalari ma’lum qilindi
O‘zbekistonning Rossiyadagi elchixonasi Rossiya hududida o‘zbekistonliklarning milliy haydovchilik guvohnomalari bilan bog‘liq masalalar yuzasidan bayonot berdi. Bu haqda Zamin.uz xabar berdi.
Ushbu ma’lumot elchixona tomonidan Telegram-kanalida e’lon qilindi. Bayonotda ta’kidlanishicha, amaldagi Rossiya qonunchiligiga binoan, O‘zbekiston fuqarolari o‘z milliy haydovchilik guvohnomalari bilan Rossiya hududida shaxsiy avtomobil boshqarishlari mumkin.
Ammo agar fuqaro Rossiyada haydovchi sifatida mehnat faoliyatini amalga oshirishni rejalashtirsa, u holda Rossiya haydovchilik guvohnomasini olish talab etiladi. Elchixona, shuningdek, Rossiya vakolatli idoralari bilan doimiy aloqada ekanligini va o‘zbekistonlik fuqarolarning huquq hamda manfaatlariga ta’sir qiluvchi har qanday o‘zgarishlar haqida o‘z vaqtida xabar berib borishini ma’lum qildi.
Shu bilan birga, Rossiya Davlat Dumasi raisi Vyacheslav Volodinning noyabr oyida bergan bayonotiga ko‘ra, Rossiya faqat rus tili rasmiy maqomga ega bo‘lgan davlatlarning haydovchilik guvohnomalarini tan olishi mumkin. Boshqa mamlakat fuqarolari esa Rossiyada haydovchilik imtihonlarini topshirishi talab qilinadi.
