Ukrainalik super og‘ir vazn toifasidagi bokschi Aleksandr Usik endi mutlaq jahon chempioni maqomiga ega emas. Bu haqda Zamin.uz xabar berdi.
U o‘z ixtiyori bilan Jahon boks tashkilotining (WBO) kamaridan voz kechdi. Bu haqda WBO rasmiy bayonot berdi.
Bayonotga ko‘ra, Usik vaziyatni atroflicha tahlil qilib, ushbu kamarni qaytarish qarorini qabul qilgan. Ammo qarorning aniq sabablari oshkor etilmagan.
37 yoshli Usik WBO kamaridan voz kechganiga qaramay, WBA, WBC va IBF yo‘nalishlari bo‘yicha jahon chempioni unvonlarini saqlab qolmoqda. Ushbu kamarlar unga 2024 yilning yozida "Uembli" stadionida Deniel Dyubua ustidan qozonilgan g‘alabadan so‘ng nasib etgan edi.
O‘sha jangda Usik ikkinchi bor mutlaq jahon chempioni bo‘lgandi. Usik WBO kamarini ilk bor 2021 yilning sentabr oyida Londonda Entoni Joshua ustidan qozongan g‘alabasi orqali qo‘lga kiritgan edi.
U uch yil davomida ushbu kamarni besh marotaba muvaffaqiyatli himoya qilgan. 2024 yilning may oyida esa Usik Tayson Fyurini mag‘lub etib, super og‘ir vazn toifasidagi barcha asosiy chempionlik kamarlarini jamlagan edi.
Biroq, iyun oyida u IBF kamaridan ham voz kechib, majburiy himoyadan bosh tortgan edi. Shu sababli u IBF kamarining vaqtinchalik sohibi maqomida qolgan, ammo to‘liq chempionlik unvonidan ayrilgan.
Endilikda Usik WBO kamaridan ham voz kechdi va mutlaq chempion maqomini yo‘qotdi. WBO ma’lumotiga ko‘ra, Usikka britaniyalik Fabio Uordli bilan jang o‘tkazish taklif qilingan, ammo Usik tashkilot talabini bajarishdan bosh tortgan.
Natijada, WBO kamar avtomatik tarzda mag‘lubiyatsiz bokschi Fabio Uordliga o‘tgan.
