AQSh elchixonasi: Semizlik vizaga ta’sir qilmaydi

So‘nggi kunlarda ijtimoiy tarmoqlar va ayrim ommaviy axborot vositalarida AQSh vizasi semizlik yoki surunkali kasallik sababli rad etilishi mumkinligi haqida xabarlar tarqaldi. Bu haqda Zamin.uz xabar berdi.

Bu borada AQShning O‘zbekistondagi elchixonasi o‘z izohini berib, bunday da’volarni asossiz deb e’lon qildi. Elchixona rasmiy bayonotida ta’kidlanishicha, AQSh Davlat departamentining sog‘liqni saqlash siyosatida B toifasidagi kasalliklar ro‘yxatida hech qanday o‘zgarish bo‘lmagan.

Vizani berish qarori arizachining umumiy holati, moliyaviy imkoniyatlari va sog‘lig‘i kabi omillarni batafsil baholash asosida qabul qilinadi. Shuningdek, elchixona semizlikning o‘zi vizani rad etish uchun avtomatik sabab bo‘la olmasligini alohida qayd etdi.

Tibbiy ko‘riklarning asosiy maqsadi arizachida jamiyat uchun xavf tug‘diruvchi yuqumli kasalliklarning bor-yo‘qligini aniqlashdan iborat. Elchixona qo‘shimcha ravishda, AQSh hukumati uchun muhim omillardan biri bu mamlakatga kirayotgan shaxsning davlatga moliyaviy yuk bo‘lmasligi va o‘z yashash hamda sog‘liqni saqlash xarajatlarini mustaqil qoplay olishiga ishonch hosil qilish ekanligini ma’lum qildi.

Ushbu yondashuv AQSh soliq to‘lovchilari manfaatlarini himoya qilishga qaratilgan.