Bryusselda bosh prokurorga suiqasd rejalaganlar ushlandi
Belgiya poytaxti Bryusselda bosh prokurorni o‘ldirishga uringan sakkiz kishi hibsga olingan. Bu haqda Zamin.uz xabar berdi.
Mamlakat federal prokuraturasi tomonidan berilgan rasmiy bayonotga ko‘ra, ushbu shaxslar Albaniya mafiyasi bilan aloqador bo‘lib, ilgari sudlangan jinoyatchilar ekani aniqlangan. Ma’lum qilinishicha, 2025-yil iyul oyida Bryussel bosh prokuroriga qarshi suiqasd uyushtirish rejalari haqida federal organlarga xabar kelib tushgan.
Tergov davomida asosiy gumonlanuvchilar aniqlanib, ular nazorat ostiga olingan. Ommaviy axborot vositalarining xabarlariga qaraganda, Bryusselda oxirgi vaqtlarda giyohvand moddalar savdosi bilan shug‘ullanuvchi jinoiy guruhlarning faolligi oshgan.
Xususan, Albaniya mafiyasi bilan bog‘liq jinoyatlar va zo‘ravonlik holatlari ortib bormoqda. Belgiya rasmiylarining ma’lumotiga ko‘ra, ayni damda mamlakatda Yevropaning 100 dan ortiq xavfli jinoiy guruhlari faoliyat olib bormoqda.
Shu yilning fevral oyida Bryusselda yuz bergan ommaviy otishmalar natijasida metro bekatlarining bir nechtasi vaqtincha yopilgan edi. Ushbu voqealar huquqni muhofaza qilish organlarining jinoyatchilikka qarshi choralarini kuchaytirishiga turtki bo‘lgan.
Hozirda qo‘lga olingan sakkiz gumonlanuvchiga nisbatan tergov ishlari davom etmoqda. Prokuratura ularni og‘ir jinoyat sodir etishga urinishda ayblash uchun tegishli hujjatlarni tayyorlamoqda.
