BAAning Abu Dhabi National Oil Company (Adnoc) kompaniyasi Lukoilning xorijdagi aktivlariga, jumladan, O‘zbekistondagi gaz loyihalariga katta qiziqish bildirmoqda. Bu haqda Zamin.uz xabar berdi.
Bu haqda Bloomberg axborot agentligi xabar berdi. Shuningdek, Amerikaning Exxon Mobil va Chevron kabi yirik kompaniyalari Lukoilning Iroqda joylashgan West Qurna-2 loyihasidagi ulushini sotib olish imkoniyatlarini o‘rganmoqda.
Lukoil aktivlariga qiziqish AQShning 13-dekabrdan kuchga kirishi kutilayotgan yangi sanksiyalari fonida ortmoqda. Ushbu sanksiyalar sababli kompaniya o‘z xalqaro biznesini tezroq sotishga harakat qilmoqda.
Hozirda xaridorlar turli yo‘nalishlarni o‘rganayotgan bo‘lsa-da, Lukoil o‘z aktivlarini yagona paket shaklida sotishni afzal ko‘rmoqda. Avvalroq kompaniya o‘z xalqaro aktivlarini Gunvor treyderiga sotishga uringan edi, biroq AQSh mazkur bitimni bloklagan.
Manbalarga ko‘ra, ayrim investorlar faqat alohida loyihalarni sotib olishni xohlamoqda. Shu sababli butun paketni avval bir moliyaviy o‘yinchi sotib olib, keyinchalik uni bo‘lib sotishi ehtimoli ham ko‘rib chiqilmoqda.
Adnoc kompaniyasi BAAning eng yirik neft-gaz korporatsiyasi hisoblanadi. U mamlakatda neft va gaz qazib olish, qayta ishlash hamda eksport qilish jarayonlarini boshqaradi.
Dunyoning nufuzli energetika kompaniyalaridan biri bo‘lgan Adnoc xalqaro loyihalardagi ulushlarni sotib olish va investitsiyalar orqali o‘z ishtirokini kengaytirmoqda.
