Krishtianu Ronaldu Oq uyda nufuzli tadbirda qatnashdi
Portugaliya terma jamoasi va Saudiya Arabistonining "Al-Nasr" klubi yetakchisi Krishtianu Ronaldu AQSh poytaxtida bo‘lib o‘tgan nufuzli tadbirda ishtirok etdi va yana bir bor jamoatchilik e’tiborini qozondi. Bu haqda Zamin.uz xabar berdi.
"The Telegraph" xabariga ko‘ra, ushbu tantanali tadbir Saudiya valiahd shahzodasi Muhammad bin Salmonning AQShga tashrifi munosabati bilan Oq uyda uyushtirilgan. Tadbirning asosiy mehmoni shahzoda bo‘lgan bo‘lsa-da, AQSh Prezidenti Donald Tramp va uning rafiqasi Melaniya Tramp ham marosimda ishtirok etdi.
Shuningdek, yig‘ilishda Davlat kotibi Marko Rubio, Moliya vaziri Skott Bessant va Mudofaa vaziri Pit Hegset kabi yuqori lavozimli rasmiylar ham qatnashdi. Ziyofat mehmonlari orasida futbol yulduzi Krishtianu Ronaldu, FIFA prezidenti Janni Infantino, Amazon asoschisi Jeff Bezos va taniqli tadbirkor Ilon Mask kabi mashhur shaxslar ishtirok etgani tadbirga alohida e’tibor qaratdi.
Kecha davomida Donald Tramp Ronalduning Oq uyga tashrifi o‘g‘li uchun katta voqea bo‘lganini ta’kidladi. Tramp: "O‘g‘lim Ronalduning katta muxlisi.
U nihoyat uni ko‘rishga muvaffaq bo‘ldi. Bu voqea o‘g‘lim uchun unutilmas bo‘ldi.
Endi u meni biroz boshqacha hurmat qiladi, chunki Ronalduni tanishtirish imkonini yaratdim", deya fikr bildirdi.
