O‘zbekistonlik shaxsning qotillik ishi: sud qarori e’lon qilindi
Rossiyaning Moskva viloyati Shyolkovo shahrida sodir bo‘lgan og‘ir jinoyat bo‘yicha sud hukmi e’lon qilindi. Bu haqda Zamin.uz xabar berdi.
Ma’lum bo‘lishicha, 26 yoshli O‘zbekiston fuqarosi 49 yoshli kar-soqov erkakni kaltaklab, o‘limiga sababchi bo‘lgan. Sud unga atigi bir yillik shartli qamoq jazosi tayinladi.
Bundan tashqari, jasadni yashirishga yordam bergan sherigi Rossiyadan deportatsiya qilindi. Bu haqda “Moskva onlayn” xabar berdi.
Hodisa joriy yilning 20-iyul kuni sodir bo‘lgan. Metall izlayotgan ikki migrant marhumning imo-ishora orqali xayolsizlik qilmaslik haqidagi ogohlantirishini noto‘g‘ri tushunib, haqorat sifatida qabul qilgan.
Natijada ulardan biri kar-soqov erkakni bir necha marta urgan. Erkak yiqilib, boshiga og‘ir jarohat olib, voqea joyida vafot etgan.
Jinoyat sodir etilganidan so‘ng, ikki shaxs jasadni chetga sudrab, izlarni yo‘qotishga uringan. Tez orada ular qo‘lga olingan.
Biri qotillikda, ikkinchisi jinoyat izlarini yashirishda aybdor deb topilgan. Dastlab tergov bu harakatni “qasddan og‘ir tan jarohati yetkazish” deb baholagan.
Ammo keyinchalik ayblov “ehtiyotsizlik oqibatida o‘limga sabab bo‘lish” moddasiga yengillashtirilgan. Shu sababli sud jazoni yengillashtirgan va shartli ravishda bir yil qamoq jazosi tayinlagan.
Marhumning qarindoshlari sud qaroridan norozilik bildirmoqda. Ularning fikricha, jabrlanuvchi janjalga sabab bo‘lmagan, aksincha, tinchlikka chaqirgan.
Tergovning ayblovni yengillashtirishi va sud hukmini ular adolatsizlik deb baholamoqda.
