Shimoliy Koreyada ikki tadbirkor qatl qilindi. Bu haqda Zamin.uz xabar berdi.
Ular o‘z bizneslari orqali katta daromad topgani va mahalliy aholining noroziligiga sabab bo‘lgani aytilmoqda. Xorijiy manbalarga ko‘ra, qatl Pxenyanda jamoatchilik oldida amalga oshirilgan va uni yuzlab odamlar, jumladan bolalar ham, tomosha qilishga majbur qilingan.
Taxminan 50 yoshdagi bu tadbirkorlar elektrovelosiped, akkumulyatorli mototsikl va oddiy velosipedlarning savdosi, ta’miri hamda ijarasi bilan shug‘ullangan. Ular rasmiy ro‘yxatdan o‘tgan bo‘lsa-da, katta daromad topgani va mahallada “qo‘l tepgan rahbarlar” sifatida tanilgani sababli qoralangan.
Mahalliy aholi ularni yuqori narxlar, past sifat va kibrli muomala uchun tanqid qilgan. Ularga “reaksion g‘oyalar va madaniyatni qabul qilmaslik to‘g‘risidagi qonun”ni buzish, chet el valyutasini noqonuniy aylantirish va tashqi tashkilotlar bilan hamkorlik qilish kabi ayblovlar qo‘yilgan.
Ushbu tadbirkorlar avgust oyida hibsga olingan va qisqa muddat ichida so‘roq qilingan. Sentyabr oyida esa o‘lim jazosiga hukm qilingan.
Ularning yaqinlari va sheriklaridan 20 ga yaqini mehnat lagerlariga yoki surgunga yuborilgan. Qatl aholi uchun “saboq” sifatida tashkil etilgan va o‘quvchilar darslardan ozod qilinib, ushbu hodisani kuzatishga majburlangan.
Bu voqea Kim Chen Inning Xitoydan qaytishi bilan bir vaqtga to‘g‘ri kelgani kuzatuvchilar tomonidan “ichki intizomni saqlashga qaratilgan ogohlantirish” sifatida talqin qilinmoqda. Mazkur voqeadan so‘ng bozorda savdo faolligi sezilarli darajada kamaygan, tadbirkorlarning korxonalari yopilgan va akkumulyator hamda ehtiyot qismlar narxi keskin oshgan.
