Shimoliy Koreyada ikki tadbirkor omma oldida qatl qilindi
Shimoliy Koreyada ikki tadbirkorning qatl qilinishi jamoatchilikda katta shov-shuvga sabab bo‘ldi. Bu haqda Zamin.uz xabar berdi.
Mazkur voqea Pxenyan shahrida amalga oshirilgan bo‘lib, unga yuzlab odamlar, jumladan, maktab o‘quvchilari ham majburiy ravishda guvoh bo‘lishgan. Xabarlarga ko‘ra, qatl etilgan tadbirkorlar 50 yosh atrofida bo‘lib, ular elektr velosipedlar, akkumulyatorli mototsikllar va oddiy velosipedlar uchun ehtiyot qismlarni sotish, ta’mirlash va ijaraga berish bilan shug‘ullangan.
Ularning faoliyati rasman ro‘yxatdan o‘tgan bo‘lsa-da, katta daromadlari va mahalliy aholi orasida mashhur bo‘lishi sababli “yirik rahbarlar” sifatida tanilgan. Biroq ba’zi fuqarolar ular tovarlarga haddan tashqari yuqori narx belgilagani, sifatsiz mahsulot sotgani va mijozlarga kibr bilan muomala qilgani haqida norozilik bildirgan.
Tadbirkorlar davlatning “Reaksion fikr va madaniyatni qabul qilmaslik to‘g‘risida”gi qonunini buzganlikda, noqonuniy valyuta aylanishida va davlatga qarshi tashqi tashkilotlar bilan hamkorlik qilishda ayblangan. Ular avgust oyida hibsga olingan, sentyabr boshida esa o‘lim jazosiga hukm qilingan.
Ularga aloqador yana 20 nafar shaxs surgun qilingan yoki mehnat lagerlariga jo‘natilgan. Qatl ochiq maydonda o‘tkazilgan bo‘lib, aholi uni tomosha qilishga majbur qilingan.
Guvohlarning so‘zlariga ko‘ra, kamida 200 kishi yig‘ilgan, jumladan, o‘quvchilar ham darsdan ozod qilinib, voqeaga guvoh bo‘lishga olib kelingan. Rasmiylar bu jazo mamlakatdagi iqtisodiy tartibsizlikning oldini olish va boshqa tadbirkorlarga saboq berish maqsadida amalga oshirilganini ta’kidlagan.
Tahlilchilarning fikricha, ushbu voqea Shimoliy Koreya hukumatining xususiy biznes faoliyatini yanada qat’iy nazorat qilishga intilayotganini ko‘rsatadi. Bundan tashqari, qatl Kim Chen Inning Xitoyga safari tugaganidan ko‘p o‘tmay amalga oshirilgani, hukumatning ichki intizomni saqlashga qaratilgan qat’iy siyosatini namoyish etishini anglatadi.
Voqeadan so‘ng bozorda savdo keskin pasaygan, tadbirkorlarning korxonalari bankrot bo‘lgan, ehtiyot qismlar va akkumulyatorlarning narxi oshgan yoki ular umuman sotilmay qolgan. Bu holat mamlakat iqtisodiyotida jiddiy muammolarni keltirib chiqargan.
