Londonda so‘nggi oylarda g‘aroyib va hayratlanarli holat kuzatilmoqda: o‘g‘irlangan Android telefonlari o‘g‘rilar tomonidan egalariga qaytarilmoqda. Bu haqda Zamin.uz xabar berdi.
Bu haqda London Centric nashri bir nechta voqealarni tahlil qilib, xabar berdi. Eng qiziq tomoni shundaki, bu "mehribonlik" faqat Android qurilmalariga taalluqli.
iPhone telefonlariga kelsak, o‘g‘rilar ularga nisbatan bunday "adolat"ni qo‘llamayotgani aytilmoqda. Sababi, iPhone qurilmalari qora bozorda qimmatroq sotilishi va talab yuqori bo‘lgani uchun o‘g‘rilar uchun jozibadorroq hisoblanadi.
Manbada keltirilgan voqealardan biri shunday: elektr velosipedda ketayotgan o‘g‘ri bir kishining qo‘lidan Samsung Galaxy telefonini tortib olmoqchi bo‘ladi. Lekin telefon Android ekanligini bilib, uni yerga tashlab, voqea joyidan qochib ketadi.
Bu model uning "mehnatiga arzimagan" ko‘rinadi. Yana bir voqea esa shunday kechgan: o‘g‘ri avvaliga yo‘lovchiga do‘stona munosabatda bo‘ladi, ammo u Android telefonidan foydalanayotganini bilgach, hech narsa olmay, orqaga qaytib ketgan.
Uchinchi holatda sakkiz kishidan iborat guruh bir fuqaroga hujum qilib, uning mol-mulkini tortib oladi. Ammo guruh a’zolaridan biri jabrlanuvchiga Samsung telefonini qaytarib beradi va indamay voqea joyini tark etadi.
Mutaxassislarning fikricha, bunday holatlar qora bozordagi talab bilan bog‘liq. iPhone qurilmalari yuqori narx va tez sotiluvchanligi bilan o‘g‘rilar uchun qimmatli bo‘lsa, Android telefonlari nisbatan arzon va ba’zan umuman qiziqarsiz deb topiladi.
Xulosa qilib aytganda, Londonda shunday manzara yuzaga kelmoqda: agar telefoningiz Android bo‘lsa, uni qaytarib olish ehtimoli yuqori. Ammo iPhone egalariga bunday omad kamdan-kam nasib etadi.
