Turkiya prezidenti Rajab Toyyib Erdo‘g‘an Anqarada Ukraina prezidenti Vladimir Zelenskiy bilan uchrashuvdan so‘ng Rossiya va Ukraina o‘rtasidagi urush yuzasidan o‘z fikrlarini bildirdi. Bu haqda Zamin.uz xabar berdi.
U mojaroni to‘xtatish va muzokaralarni tezlashtirish uchun Rossiya bilan bir qatorda AQSHning ham faol ishtirokini muhim deb hisoblashini ta’kidladi. Erdo‘g‘anning so‘zlariga ko‘ra, Turkiya Moskva bilan adolatli, barqaror va uzoq muddatli tinchlikka erishish uchun takliflarni muhokama qilishga tayyor.
U shuningdek, Rossiya bilan yarashuvni jadallashtiruvchi tashabbuslar ustida ishlashga hozir ekanini aytdi. Bu jarayonda AQSHning ishtiroki katta ahamiyatga ega ekanini qayd etdi.
Anqaraning fikricha, Vashingtonning bu jarayonga qo‘shilishi diplomatik muzokaralarni faollashtirishi va tomonlarni bir stol atrofida yig‘ishga yordam berishi mumkin. Turkiya rahbari bu tashabbuslarni amalga oshirishda barcha tomonlarning hamkorligi zarur ekanini ta’kidladi.
