Litva Belarus bilan chegaradagi ikki o'tish punktini belgilangan muddatdan avval ochishga qaror qildi. Bu haqda Zamin.uz xabar berdi.
Gap Shalchininkay va Myadininkay o'tish punktlari haqida bormoqda. Ushbu punktlar oktyabr oyining oxirida Belarusdan uchib kelgan va Vilnyus aeroporti faoliyatiga xalaqit bergan meteo-sharlar sababli yopilgan edi.
Dastlab bu cheklovlar 30-noyabrgacha davom etishi rejalashtirilgan edi. Ichki ishlar vaziri Vladislav Kondratovichning ma'lum qilishicha, vaziyat o'zgargan va avvalgi cheklovlarni davom ettirishga hojat qolmagan.
Shunga qaramay, hukumat agar kontrabanda sharalari bilan bog‘liq muammolar yana yuzaga kelsa, chegaralar qayta yopilishi mumkinligini ta’kidladi. Bosh vazir Inga Ruginene meteo-sharlar soni ancha kamayganini va Vilnyus aeroporti barqaror ishlayotganini qayd etdi.
Uning so‘zlariga ko‘ra, o'tish punktlarini qayta ishga tushirish uchun bir kun kifoya. 17-noyabr kuni Polsha Belarus bilan chegaradagi nazorat punktlarini qayta ochganidan so‘ng, Litva Belarus chegara xizmati bilan texnik muzokaralar o‘tkazdi.
Muzokaralarda kontrabanda, migratsiya va qo‘shni davlatda qolib ketgan litvalik yuk mashinalari masalalari muhokama qilindi. Litva Chegara xizmati rahbari Rustamas Lyubayevas Belarusning hamkorlik qilishga tayyorligini bildirganini ma’lum qildi.
Litva tomoni kontrabanda sxemalarini to‘xtatish va tiqilib qolgan yuk mashinalarining o‘z mamlakatlariga qaytishiga imkon yaratishni talab qildi. Avvalroq Belarus Litva yuk mashinalarining chegaradan o'tishini to‘xtatgan edi, bu esa mingdan ortiq avtomobilning navbatda qolib ketishiga sabab bo‘lgan.
Minsk esa kontrabanda ayblovlarini inkor etib, bu ishlarda litvaliklarning o‘zlari ishtirok etayotganini ta’kidlagan. Belarus prezidenti Aleksandr Lukashenko Vilnyusning o'tish punktlarini yopish qarorini “noto‘g‘ri va mantiqsiz harakat” deb tanqid qilgan edi.
