Qozog‘istonda ORVI keng tarqalmoqda, maktablar yopilmoqda
Qozog‘istonda o‘tkir respirator virusli infeksiyalar (ORVI) keng tarqalmoqda. Bu haqda Zamin.uz xabar berdi.
Sog‘liqni saqlash vaziri Oqmaral Alnazarova bergan ma’lumotlarga ko‘ra, o‘tgan haftada mamlakat bo‘ylab 183 mingdan ortiq kishi ORVI bilan kasallangan. Bu ko‘rsatkich o‘tgan yilgi mavsumga nisbatan 16 foizga ko‘pdir.
Vazirning so‘zlariga ko‘ra, bu yilgi gripp mavsumi odatdagidan ancha erta boshlangan — 41-haftada. Mamlakatda yangi gripp shtammlari aniqlanmagan bo‘lsa-da, rinovirus, paragripp, adenovirus va koronavirus kabi boshqa viruslar faol tarqalmoqda.
1 sentyabrdan buyon qayd etilgan 1,4 million kasallanish holatlarining 66 foizi 14 yoshgacha bo‘lgan bolalar ulushiga to‘g‘ri keladi. Bundan tashqari, homilador ayollar uchun xavfli hisoblangan Gonkong grippi shtammi 600 ga yaqin bemorda aniqlangan.
Kasallikning tez tarqalishi sababli ayrim hududlarda maktablar vaqtincha masofaviy ta’limga o‘tkazilmoqda. Sharqiy Qozog‘iston viloyatida 23 ta maktabning 169 ta sinfi — jami 3015 o‘quvchi onlayn ta’limga o‘tdi.
Abay viloyatida esa o‘quv yili boshidan buyon 5558 bola ORVI bilan kasallangan, bu hududdagi umumiy holatlarning 17,2 foizini tashkil etadi. Qo‘stanay viloyatida ham vaziyat jiddiy bo‘lib, ikki shaharda o‘quvchilar darslarni onlayn shaklda davom ettirishga majbur bo‘ldi.
Qo‘stanay tumanida 72 ta sinfda an’anaviy ta’lim vaqtincha to‘xtatildi. Bosh vazir O‘ljas Bektenov mahalliy hokimiyat va sog‘liqni saqlash tizimi vakillariga tibbiy xizmat sifatini qat’iy nazorat qilish bo‘yicha topshiriqlar berdi.
