Portugaliyada 9 yoshli bola bezorilik qurboni bo‘ldi

Portugaliyada 9 yoshli braziliyalik bola maktabda shafqatsiz bezorilik qurboniga aylandi. Bu haqda Zamin.uz xabar berdi.

Euronews xabariga ko‘ra, sinfdoshlari uni maktab hojatxonasida qamab, ikkita barmoq uchini jiddiy jarohat yetkazgan holda uzib tashlashgan. Bolaning onasi Niviya Estevamning so‘zlariga ko‘ra, o‘g‘li ko‘p qon yo‘qotib, eshik ostidan emaklab chiqishga majbur bo‘lgan.

Onaning aytishicha, bola bundan oldin ham doimiy zo‘ravonliklarga duch kelgan, jumladan, tepish, bo‘g‘ish va sochidan tortish holatlari bo‘lgan. Hodisadan so‘ng bola Portodagi San-Juau shifoxonasida uch soatlik jarrohlik amaliyotidan o‘tgan.

Hozirda u kuchli og‘riq qoldiruvchi dorilar va antibiotiklar qabul qilmoqda. Shuningdek, bola ruhiy zarbaga uchragan, har kecha hodisani eslab yig‘lab chiqayotgani qayd etilgan.

Mazkur ishni olib borayotgan advokatlar ushbu hujumda ksenofobik omillar bo‘lgan-bo‘lmaganini o‘rganmoqda. Ular maktabni bolaning xavfsizligini ta’minlay olmagani va hodisa joyini mutaxassislar tekshirmasidan avval tozalashga uringani uchun ayblamoqda.

Psixologlar ta’kidlashicha, Portugaliya maktablarida o‘quvchilar o‘rtasidagi zo‘ravonlik holatlari so‘nggi yillarda sezilarli darajada ko‘paygan. Statistikaga ko‘ra, 2020–2021 o‘quv yilida 4 620 ta zo‘ravonlik holati qayd etilgan bo‘lsa, 2024–2025-yillarda bu ko‘rsatkich 7 804 taga yetgan.

Bu esa muammoning jiddiy ko‘lamga ega ekanini ko‘rsatmoqda.