G‘azoda 40 ming bola yuqumli kasalliklarga qarshi emlanadi
Jahon sog‘liqni saqlash tashkiloti (JSST) G‘azo hududida qisqa muddatli sulhdan foydalangan holda, 40 mingdan ortiq bolani turli yuqumli kasalliklarga qarshi emlash rejasini e’lon qildi. Bu haqda Zamin.uz xabar berdi.
Al Arabiya xabariga ko‘ra, 9-noyabrda boshlangan emlash kampaniyasining dastlabki sakkiz kunida uch yoshgacha bo‘lgan 10 mingdan ziyod bola birinchi doza bilan emlangan. JSST rahbari Tadros Adhanom Gebreesusning ma’lumotiga ko‘ra, 22-noyabrga qadar bolalar qizamiq, tepki, qizilcha, difteriya, qoqshol, ko‘kyo‘tal, gepatit B, sil, rotavirus, poliomiyelit va zotiljam kabi kasalliklarga qarshi emlanishi rejalashtirilgan.
Ushbu tashabbus UNICEF, UNRWA va G‘azo sog‘liqni saqlash vazirligi bilan hamkorlikda amalga oshirilmoqda. Keyingi emlash bosqichlari esa dekabr va yanvar oylariga mo‘ljallangan.
Tadros Adhanom Gebreesus sulh xalqaro tashkilotlarga G‘azoda tibbiy yordamni kuchaytirish va vayron bo‘lgan sog‘liqni saqlash infratuzilmasini tiklashga imkoniyat yaratganini ta’kidladi. Bundan tashqari, BMT Xavfsizlik Kengashi 17-noyabr kuni AQShning G‘azo bo‘yicha rejasini ma’qullagani ma’lum qilindi.
2023-yil 7-oktyabrdan buyon davom etayotgan harbiy harakatlar oqibatida 69 mingdan ortiq falastinlikning halok bo‘lgani, ularning aksariyati ayollar va bolalar ekani qayd etilgan.
