O‘zbekistonlik fuqaro AQShda hibsga olindi: sabab nima?
Pensilvaniya shtati gubernatori Josh Shapiro o‘zbekistonlik fuqaro Axror Bozorov bilan bog‘liq voqea yuzasidan rasmiy bayonot berdi. Bu haqda Zamin.uz xabar berdi.
Unga ko‘ra, Bozorov O‘zbekiston tomonidan jihod targ‘iboti bilan shug‘ullanganlikda ayblanib, qidiruvga berilgan bo‘lsa-da, AQShning Pensilvaniya shtatida tijorat haydovchilik guvohnomasini (CDL) qo‘lga kiritgan. Shapiro ma’lumotlariga ko‘ra, guvohnoma berish jarayonida Pensilvaniya rasmiylari federal darajadagi Systematic Alien Verification for Entitlements (SAVE) tizimidan foydalangan.
Biroq mazkur tizimda Bozorovning qidiruvda ekanligi haqida hech qanday ma’lumot bo‘lmagani sababli, guvohnoma berishda to‘siq bo‘lmagan. Shapiro bu haqda shunday dedi: “Biz foydalanayotgan tizim o‘z vazifasini to‘liq bajarmadi.
Pensilvaniya barcha zarur tekshiruvlarni amalga oshirdi, ammo federal bazada kerakli ma’lumotlar aks etmagani sababli xato yuz berdi.” Ma’lum bo‘lishicha, 31 yoshli Axror Bozorov 9-noyabr kuni Kanzas shtatida yuk mashinasi haydovchisi sifatida faoliyat olib borayotganida hibsga olingan. O‘zbekiston hukumati unga jihodga chaqiriq va tarafdorlarni yollash maqsadida onlayn materiallar tarqatganlik aybini qo‘ygan.
Ushbu ayblov bo‘yicha 2022-yilda hibsga olish orderi chiqarilgan edi. Mazkur voqeadan so‘ng, Pensilvaniya rasmiylari tijorat haydovchilik guvohnomalarini chet ellik fuqarolarga berish jarayonini qayta ko‘rib chiqishga kirishdi.
Shuningdek, federal idoralardan ma’lumot almashish tizimini takomillashtirish va kuchaytirishni talab qildi.
