Pensilvaniya noqonuniy guvohnomalar uchun moliyadan mahrum bo‘lishi mumkin

AQSh Transport vazirligi Pensilvaniya shtatini qariyb 75 million dollarlik federal moliyalashtirishdan mahrum qilish bilan ogohlantirdi. Bu haqda Zamin.uz xabar berdi.

Bu qaror tijorat haydovchilik guvohnomalari (CDL) berish jarayonida qonunbuzarliklar aniqlanganidan so‘ng qabul qilindi. Ushbu bayonot 20-noyabr kuni e’lon qilindi.

Avtotransport xavfsizligi bo‘yicha federal boshqarma (FMCSA) ma’lumotlariga ko‘ra, Pensilvaniya noqonuniy ravishda AQSh hududida noqonuniy yashayotgan shaxslarga tijorat guvohnomalari bergan. Hisobotda ayrim guvohnoma oluvchilar "malakasiz va mos emas" deb topilgani qayd etilgan.

Transport vaziri Shon P. Daffi shtat noqonuniy ravishda berilgan guvohnomalarni bekor qilishi va qonunbuzarliklarni bartaraf etishi zarurligini ta’kidladi.

Aks holda, federal moliyalashtirish to‘xtatilishi mumkinligini ma’lum qildi. Shuningdek, vazirlik ushbu muammo xorijliklarga berilgan litsenziyalarni tekshirish jarayonining muhimligini ko‘rsatishini bildirdi.

Bu masala o‘zbekistonlik Axror Bozorovning qo‘lga olinishi bilan bog‘liq. Bozorov O‘zbekistonda ekstremistik materiallarni tarqatishda ayblanib qidiruvga berilgan.

AQShda u Pensilvaniyada olingan litsenziya asosida yuk mashinasi haydovchisi sifatida faoliyat yuritgan. Pensilvaniya gubernatori Josh Shapiro Bozorov federal SAVE bazasi orqali tekshirilganini va hech qanday shubhali holat aniqlanmaganini ta’kidladi.

Shu bilan birga, Transport vazirligi qonunbuzarliklarni bartaraf etish bo‘yicha qat’iy choralar ko‘rishni talab qilishda davom etmoqda.