Qozog‘iston YEOQShdagi ishtirokini to‘xtatdi

Qozog‘iston Yevropadagi Oddiy Qurollar bo‘yicha Shartnomadagi (YEOQSh) ishtirokini to‘xtatishga qaror qildi. Bu haqda Zamin.uz xabar berdi.

Ushbu qarorni mamlakat prezidenti Qasim-Jomart Toqayev 2023-yil 17-noyabr kuni imzoladi. YEOQSh dastlab 1990-yil noyabr oyida NATOning 16 davlati va Varshava shartnomasi ittifoqining 6 davlati tomonidan imzolangan.

Bu shartnoma Atlantikadan Uralgacha bo‘lgan hududda harbiy texnikalar, jumladan, tanklar, zirhli texnikalar, 100 mm va undan kattaroq kalibrli artilleriya qurilmalari, jangovar samolyotlar hamda hujumchi vertolyotlar soniga cheklovlar kiritishni ko‘zda tutadi. Umuman olganda, mazkur shartnomaga 28 davlat a’zo bo‘lgan.

1999-yilda Istanbulda bo‘lib o‘tgan YEXHT sammitida YEOQShning yangilangan talqini taqdim etilgan. Biroq bu versiyani faqat to‘rtta davlat — Rossiya, Belarus, Qozog‘iston va Ukraina ratifikatsiya qilgan.

2007-yilda Rossiya shartnomadagi ishtirokini to‘xtatgan va 2023-yilda undan butunlay chiqqan. Rossiyaning bu qaroridan keyin NATO davlatlari ham YEOQShdagi ishtirokini noma’lum muddatga to‘xtatgan.

Belarus, Ukraina va Moldova ham shunga o‘xshash qarorlar qabul qilgan. Shunday qilib, Qozog‘istonning YEOQShdagi ishtirokini to‘xtatishi ushbu shartnoma doirasida faoliyatni davom ettiruvchi davlatlar sonining yanada qisqarishiga olib kelmoqda.