Rossiyaliklar tinchlik istaydi, lekin ishonch past

Rossiyaliklarning urushga munosabati va tinchlikka intilishi haqida o‘tkazilgan so‘rov natijalari jamoatchilikda katta muhokamalarga sabab bo‘ldi. Bu haqda Zamin.uz xabar berdi.

“Xroniki” tadqiqot loyihasi tomonidan 2025-yil oktyabr oyida o‘tkazilgan ushbu tadqiqot natijalariga ko‘ra, rossiyaliklarning 63–64 foizi urushni to‘xtatish va Ukraina bilan muzokaralar asosida tinchlik shartnomasi imzolanishini istaydi. Ammo faqat 36 foiz respondent bunday natijaning amalga oshishiga ishonch bildirgan.

So‘rovda qatnashganlar ikki guruhga bo‘lingan: bir qismi hukumatdan qanday qarorlar qabul qilinishini kutayotganini bildirgan, boshqalari esa o‘zlari Rossiyada qanday o‘zgarishlarni xohlashlarini aytgan. Respondentlarning 78 foizi armiya xarajatlarini oshirishni, 48 foizi ichki ijtimoiy muammolarga ko‘proq e’tibor qaratilishini, 47 foizi esa Kreml e’lon qilgan maqsadlar amalga oshirilgach, urushni to‘xtatishni qo‘llab-quvvatlagan.

Tinchlik shartnomasi tuzilishiga 36 foiz respondent ehtimol bergan bo‘lsa, 35 foizi safarbarlik bo‘lishi mumkinligini aytgan. G‘arb bilan munosabatlarni yaxshilash (28 foiz) va sanksiyalarni bekor qilish (22 foiz) esa pastroq ehtimol sifatida baholangan.

Rossiyaliklarning xohishlari va voqelik o‘rtasida sezilarli farq mavjud. Eng ko‘p istalgan o‘zgarishlar qatorida urushni tugatish va ichki muammolarni hal qilish (88 foiz), tinchlik shartnomasiga erishish (64 foiz), sanksiyalarni bekor qilish (63 foiz) va g‘arb bilan munosabatlarni tiklash (58 foiz) o‘rin olgan.

Armiya xarajatlarini oshirishni 49 foiz, safarbarlikni esa atigi 16 foiz respondent ma’qullagan. So‘rov natijalariga ko‘ra, respondentlarning 50 foizi urushni qo‘llab-quvvatlagan bo‘lsa, 39 foizi bu savolga javob berishdan qochgan.

Faqat kichik bir guruh urushni qo‘llab-quvvatlamasligini bildirgan. Urushda ishtirok etishga kelganda, 28 foiz respondent “buyruq bo‘lsa, qatnashaman” degan, 9 foizi ixtiyoriy ravishda borishga tayyorligini bildirgan.

Shu bilan birga, 38 foiz respondent urushda ishtirok etishga qarshi ekanini aytgan, 19 foizi esa javob berishdan bosh tortgan. Shuningdek, agar oila a’zosi frontga borishni istasa, 55 foiz respondent bu qarorni qo‘llab-quvvatlamasligini bildirgan, 30 foiz buni ma’qullagan, qolgan 15 foiz esa fikr bildirishdan tiyilgan.

So‘rov natijalari shuni ko‘rsatadiki, rossiyaliklar orasida tinchlikka intilish kuchaygan bo‘lsa-da, aksariyat odamlar hukumatning bunday yo‘lni tanlashiga ishonmayapti. Umid va real kutilmalar o‘rtasida jiddiy tafovut saqlanib qolmoqda.