Qarishga qarshi tabiiy himoya hujayralari aniqlandi
Isroillik olimlar inson umrini uzaytirish bo‘yicha muhim kashfiyotga erishdi. Bu haqda Zamin.uz xabar berdi.
Ularning Nature Aging ilmiy jurnalida chop etilgan tadqiqotlari qarish jarayonining ichki mexanizmlarini yanada chuqurroq tushunishga yordam berdi. Tadqiqot davomida mutaxassislar CD4-Eomes nomli noyob T-hujayra turini aniqlashdi.
Ushbu hujayralar organizmda o‘z vazifasini bajargan va endi to‘qimalarga zarar yetkazishi mumkin bo‘lgan qarigan hujayralarni aniqlab, ularni yo‘q qilishda ishtirok etadi. Ma’lum bo‘lishicha, aynan shu qarigan hujayralarning ko‘payishi organizmda zaiflik, yallig‘lanish va turli kasalliklar xavfini oshiradi.
O‘tkazilgan tajribalar shuni ko‘rsatdiki, agar CD4-Eomes hujayralari yetarli darajada bo‘lmasa, qarish jarayoni tezlashadi. Buning oqibatida mushaklar zaiflashadi, organlar faoliyati pasayadi va inson umrining davomiyligi qisqaradi.
Aksincha, ushbu hujayralar faoliyati kuchaytirilsa yoki ularning soni ortsa, qarish jarayoni sekinlashishi mumkin. Qiziqarli jihati shundaki, bu turdagi hujayralar uzoq umr ko‘rgan odamlarda ko‘proq uchraydi.
Olimlar bu xulosadan kelib chiqib, CD4-Eomes hujayralari qarishga qarshi tabiiy himoya vositasi ekanligini ta’kidlashmoqda. Tadqiqotchilarning fikricha, kelajakda ushbu hujayralarni sun’iy ravishda ko‘paytirish yoki faollashtirish texnologiyasi ishlab chiqilsa, inson umrini sog‘lom o‘tkaziladigan davri sezilarli darajada uzayishi mumkin.
Bu kashfiyot tibbiyot sohasida yangi imkoniyatlar eshigini ochishi kutilmoqda.
