Bangladeshda zilzila: 6 kishi halok, 100 kishi jarohatlandi
Bangladeshda 21-noyabr kuni 5,7 magnitudali zilzila sodir bo‘ldi. Bu haqda Zamin.uz xabar berdi.
Hukumat ma’lumotlariga ko‘ra, tabiiy ofat oqibatida kamida olti kishi halok bo‘lgan, qariyb 100 nafar fuqaro jarohat olgan. AQSH Geologiya xizmati esa zilzila kuchini 5,5 magnitudada baholagan.
Zilzila natijasida Dakka shahri va bir nechta boshqa hududlardagi binolarga zarar yetgan. Yer silkinishi Hindistonning chegaradosh shtatlarida ham sezilgan.
Muhammad Yunusning aytishicha, jabrlanganlar orasida Dakka universiteti talabalari, Gazipur shahri ishchilari va Narsingdi aholisi bor. Politsiya bergan ma’lumotga ko‘ra, olti qavatli bino qulagan, natijada uch kishi halok bo‘lgan.
Yana uch kishi tom va devor ostida qolib vafot etgan. Sog‘liqni saqlash maslahatchilarining xabar berishicha, ayrim jarohatlanganlarning ahvoli og‘ir.
Hodisa guvohlari kuchli yer silkinishi, odamlar orasida vahima va tirbandlik yuzaga kelganini ta’kidlagan. Hukumat qutqaruv ishlarini kuchaytirish va jabrlanganlarga yordam ko‘rsatish bo‘yicha ko‘rsatmalar bergan.
