Ijtimoiy tarmoqdagi layklar uchun 500 ming lira jarima.
Turkiyada ijtimoiy tarmoqlardagi faoliyat sababli yuzaga kelgan holat keng muhokamalarga sabab bo‘ldi. Bu haqda Zamin.uz xabar berdi.
Oliy sud erning boshqa ayollarning suratlariga layk bosgani uchun aybdor ekanini tasdiqladi. Bu haqda "Habertürk" nashri ma’lumot berdi.
Ma’lum bo‘lishicha, er-xotin o‘rtasidagi munosabatlar uzoq vaqt davomida tarang bo‘lgan va oxir-oqibat ular ajrashish uchun sudga murojaat qilishgan. Ayolning so‘zlariga ko‘ra, eri uni hurmat qilmagan, moddiy tomondan ta’minlashda sustkashlik qilgan va ijtimoiy tarmoqlarda begona ayollarning suratlariga layk bosib, oilaviy sadoqatga rioya qilmagan.
Sud bu da’volarni o‘rganib chiqib, ayolning aytganlarini tasdiqlagan. Natijada, er ajrimda aybdor deb topilgan.
Qarorga ko‘ra, u sobiq rafiqasiga 500 ming lira miqdorida ma’naviy zarar to‘lashi va har oy 5 ming lira aliment ajratishi belgilangan. Ushbu qaror Oliy sud tomonidan pretsedent sifatida qayd etilgan.
Bu esa kelajakda shunga o‘xshash ishlar bo‘yicha sud qarorlariga ta’sir ko‘rsatishi mumkin. Mazkur holat ijtimoiy tarmoqlardagi faoliyatning oilaviy munosabatlarga ta’siri borasida dolzarb masalalarni ko‘tarib chiqdi.
