Vyetnamda suv toshqinlari 55 kishining umriga zomin bo‘ldi
Vyetnamning markaziy hududlarida kuchli yomg‘ir va suv toshqinlari oqibatida halok bo‘lganlar soni 55 nafarga yetdi. Bu haqda Zamin.uz xabar berdi.
Shuningdek, 13 nafar fuqaroning taqdiri hanuz noma’lum bo‘lib qolmoqda. Bu haqda mamlakatning dambalar va tabiiy ofatlarni oldini olish bo‘yicha departamenti ma’lum qildi.
Tabiiy ofatlar natijasida taxminan 80 ming gektar qishloq xo‘jaligi yerlari, jumladan, chorvachilik maydonlari suv ostida qolgan. Bundan tashqari, 3,2 million boshdan ortiq chorva mollari va uy qushlari nobud bo‘lgani qayd etilgan.
Hozirda 28 mingdan ortiq xonadonlar suv bosgan holatda qolmoqda, 946 ta uy esa butunlay vayron bo‘lgan. Departament bergan ma’lumotlarga ko‘ra, tabiiy ofat tufayli mamlakat iqtisodiyoti 9 trillion dong (taxminan 358 million AQSh dollari) zarar ko‘rgan.
Vyetnam hukumati tabiiy ofat oqibatlarini bartaraf etish bo‘yicha tegishli ishlarni davom ettirmoqda. Shu bilan birga, aholiga yordam ko‘rsatish va xavfsizlikni ta’minlash choralari kuchaytirilgan.
