Van Gogning nodir asari 62,7 mln dollarga sotildi
Niderlandiyalik mashhur rassom Vinsent Van Gogning yana bir nodir asari dunyo san’at bozorida katta qiziqish uyg‘otdi. Bu haqda Zamin.uz xabar berdi.
Yaqinda Nyu-York shahrida o‘tkazilgan Sotheby’s auksionida rassomning “Parij romanlari to‘plamlari va stakandagi atirgullar” nomli kartinasi 62,7 million dollarga sotildi. Bu haqda NL Times xabar berdi.
Ma’lumotlarga ko‘ra, ushbu asar taniqli san’atshunos Petti Vong tomonidan xarid qilingan. Lotning yakuniy narxi dastlabki baholardan 35 foizga yuqori bo‘lgan.
Auksion oldidan Amsterdamdagi Van Gog muzeyi mutaxassislari mazkur polotnoni batafsil o‘rganib, uning haqiqiyligini tasdiqlashgan. Mazkur asar 1887 yilning noyabr-dekabr oylarida Parijda, Van Gog akasi Teo bilan birga yashagan davrda chizilgan.
Bu davrda rassom fransuz san’ati va hayoti ta’sirida o‘zining yanada erkin va jo‘shqin uslubini shakllantirgan. Ko‘plab san’at ixlosmandlari ushbu sotuvni Van Gog ijodiga bo‘lgan qiziqishning oshib borayotganini tasdiqlovchi muhim hodisa sifatida baholamoqda.
