Eron poytaxtini Makron mintaqasiga ko‘chirish rejalashtirilmoqda
Eron hukumati poytaxt Tehronni boshqa hududga ko‘chirish masalasini ko‘rib chiqmoqda. Bu haqda Zamin.uz xabar berdi.
Bu haqda Eron prezidenti Masud Pezeshkian ma’lum qilgan. Prezidentning so‘zlariga ko‘ra, Tehron aholisining haddan tashqari ko‘pligi, qurg‘oqchilik va suv resurslarining yetishmasligi shaharning kelajakdagi rivojlanishini murakkablashtirmoqda.
Shu sababdan hukumat janubi-sharqdagi Makron mintaqasini yangi poytaxt sifatida tanlashni taklif qilmoqda. Poytaxtni ko‘chirish masalasi uzoq yillardan beri muhokamada bo‘lgan, biroq moliyaviy mablag‘larning yetishmasligi bu loyihaning amalga oshirilishini kechiktirgan.
Prezidentning fikricha, hozirgi holat poytaxtni ko‘chirish zaruriyatini yuzaga keltirmoqda. Hozirgi vaqtda Tehronda taxminan 10 million kishi yashaydi va shahar zich qurilish hamda suv taqchilligiga bardosh bera olmayapti.
Aholi orasida suv tanqisligi bo‘yicha tashvishlar ortib bormoqda, hatto qisman evakuatsiya ehtimoli haqida ham so‘z yuritilmoqda. Ekologlar muammolar faqat qurg‘oqchilik bilan emas, balki suv resurslarining noto‘g‘ri boshqarilishi bilan bog‘liq ekanini ta’kidlamoqda.
Ular zamonaviy suv tejash texnologiyalarini joriy etish va shaharni rejalashtirish yondashuvlarini qayta ko‘rib chiqishni taklif qilmoqda. Makron mintaqasi Ummon ko‘rfazi sohilida joylashgan bo‘lib, dengiz savdosi uchun strategik ahamiyatga ega.
Ushbu hudud Siston va Balujochiston viloyatiga kiradi va geografik joylashuvi tufayli poytaxt bo‘lish uchun qulay hudud sifatida ko‘rilmoqda.
