Mang‘istauda tulki hujumi: ikki bola jarohatlandi
Qozog‘istonning Mang‘istau viloyatida maktab o‘quvchilariga tulkilar hujum qilgani mahalliy aholini xavotirga soldi. Bu haqda Zamin.uz xabar berdi.
Ma’lum bo‘lishicha, hodisa 21-noyabr kuni sodir bo‘lgan bo‘lib, ikki nafar bola jarohat olgan. Rasmiy ma’lumotlarga ko‘ra, korsak tulkisi qishloq maktabining ikki nafar o‘quvchisiga hujum qilgan.
Bolalar ota-onalari bilan Beyneu tumani shifoxonasiga murojaat qilishgan. Tekshiruv natijasida 2011 yilda tug‘ilgan bolaning o‘ng oyog‘ida, 2018 yilda tug‘ilgan bolaning esa chap oyog‘ida tirnalish jarohatlari aniqlangan.
Shifokorlar tomonidan ularga zarur jarrohlik yordami ko‘rsatilgan va emlash ishlari amalga oshirilgan. Ayni paytda bolalarning ahvoli qoniqarli deb baholanmoqda.
Mutaxassislar yovvoyi hayvonlar hujumi bilan bog‘liq bunday holatlarda tezkor tibbiy yordamga murojaat qilish zarurligini ta’kidlamoqda. Ekolog Odilbek Qo‘zibaqovning so‘zlariga ko‘ra, yovvoyi hayvonlar quturish kabi xavfli viruslarni tarqatishi mumkin.
Shu sababli fuqarolarga begona hayvonlarga yaqinlashmaslik va xavf sezilgan taqdirda darhol tegishli idoralarga murojaat qilish tavsiya etiladi.
