Qirg‘iziston elektr muammosini hal qilish rejasini e’lon qildi
Qirg‘iziston prezidenti Sadir Japarov mamlakatda elektr ta’minoti bilan bog‘liq uzilishlar yuzasidan bildirayotgan e’tirozlarga o‘z fikrini bildirdi. Bu haqda Zamin.uz xabar berdi.
Unga ko‘ra, so‘nggi besh yil ichida yirik loyihalar amalga oshirilmaganida, bugungi kunda qirg‘izistonliklar elektr energiyasiz qolgan bo‘lishlari mumkin edi. Prezident o‘z nutqida shunday dedi: “Agar men zavodlar, fabrikalar, maktab va bolalar bog‘chalarini qurmaganimda, hozir elektr yetarli bo‘lardi.
Lekin bunday infratuzilmasiz kelajakni tasavvur qilib bo‘lmaydi”. Japarovning so‘zlariga ko‘ra, davlat hozirda elektr energiyasini Qozog‘iston, O‘zbekiston, Rossiya va Turkmanistondan 3,5 somdan sotib olib, aholiga 1,37 somdan yetkazib bermoqda.
Bu davlat budjeti uchun katta yuk bo‘lishiga qaramay, fuqarolarning manfaati birinchi o‘rinda turishini alohida ta’kidladi. Shuningdek, davlat rahbari energetika sohasidagi muammolarni hal qilish uchun aniq rejalar ishlab chiqilganini ma’lum qildi.
U Qirg‘iziston 2028 yilga qadar elektr ta’minotidagi inqirozdan to‘liq chiqib, barqaror energetik tizimga ega bo‘lishini va’da berdi.
