Mang‘istauda tulki ikki bolaga hujum qildi
Qozog‘istonning Mang‘istau viloyatida yovvoyi hayvonlar bilan bog‘liq noodatiy va xavotirli voqea sodir bo‘ldi. Bu haqda Zamin.uz xabar berdi.
Mahalliy qishloq maktabining ikki o‘quvchisi tulki hujumiga uchradi. Ushbu holat haqida “Nur.kz” axborot agentligi xabar berdi va bu voqea jamoatchilik e’tiborini tortdi.
Viloyat Sog‘liqni saqlash boshqarmasi ma’lumotiga ko‘ra, 21-noyabr kuni ikki nafar maktab o‘quvchisi noma’lum hayvon tomonidan hujumga uchradi. Bolalar ota-onalari tomonidan zudlik bilan Beyneu markaziy tuman shifoxonasiga olib borildi.
Keyinchalik aniqlanishicha, hujum qilgan hayvon korsak tulkisi bo‘lgan. Shifokorlarning dastlabki tekshiruvlariga ko‘ra, 2011-yilda tug‘ilgan bolaning o‘ng oyoq boldir qismida, 2018-yilda tug‘ilgan bolaning esa chap oyog‘ida tirnalish va tishlash izlari aniqlangan.
Jarohatlangan bolalarga zudlik bilan jarrohlik aralashuvi amalga oshirilib, zaruriy emlashlar o‘tkazildi. Hozirda ularning ahvoli qoniqarli deb baholanmoqda va ular ambulator kuzatuv ostida.
Mutaxassislarning fikricha, yovvoyi hayvonlar, jumladan, tulkilar quturish kasalligi kabi xavfli infeksiyalarni tarqatishi mumkin. Ekolog Odilbek Qo‘zibaqovning ta’kidlashicha, bunday hayvonlarga yaqinlashish yoki ularni qo‘lga olish juda xavfli.
Agar kimdir yovvoyi hayvon bilan to‘qnash kelgan bo‘lsa, darhol tegishli idoralarga xabar berishi va zarurat tug‘ilsa, shifokorga murojaat qilishi lozim. Bu kabi vaziyatlarda ehtiyotkorlik va zudlik bilan chora ko‘rish juda muhim.
