Afrika qit’asi ikki qismga bo‘linishi mumkin
Afrika qit’asi ichki qismidan asta-sekin ajralib borayotgani haqida olimlar tomonidan ilgari surilgan ilmiy xulosalar yana bir bor tasdiqlandi. Bu haqda Zamin.uz xabar berdi.
Britaniyalik geologlarning tadqiqotlariga ko‘ra, bu jarayon kelajakda qit’aning umumiy geografik ko‘rinishini tubdan o‘zgartirishi va markazida yangi okean vujudga kelishiga olib kelishi mumkin. Kil universiteti olimlari Afrika va Arabiston plitalari orasida sodir bo‘layotgan ajralish jarayonini magnit maydon o‘zgarishlari orqali kuzatgan.
Ularning aniqlashicha, bu jarayon shimoli-sharqdan janubga qarab chuqurlashib, yer silkinishlari bilan birga davom etmoqda. Seysmik faollikning kuchayishi bu hududda geologik o‘zgarishlar tezlashayotganidan dalolat beradi.
Tadqiqotchilar bu o‘zgarishlar yaqin kelajakda sodir bo‘lmasligini, lekin jarayonning to‘liq yakunlanishi uchun millionlab yillar kerakligini ta’kidlashmoqda. Dastlabki prognozlarga ko‘ra, taxminan 5–10 million yil ichida Afrika ikki yirik qismga bo‘linishi mumkin.
Bir tomonda Misr, Jazoir, Nigeriya, Gana va Namibiya joylashgan hudud qolsa, ikkinchi tomonda Somali, Keniya, Tanzaniya, Mozambik va Efiopiyaning katta qismi kiruvchi yangi geologik mintaqa shakllanishi kutilmoqda. Olimlarning fikricha, bu jarayon insoniyat hayotiga katta ta’sir ko‘rsatmaydi, lekin geologiya tarixi uchun ulkan o‘zgarish bo‘lib, sayyoramizning kelajakdagi ko‘rinishini belgilashi mumkin.
