Ayshat Baymuradovaning fojiasi: erkinlik uchun kurash va o‘lim

23 yoshli Ayshat Baymuradova Chechenistondan qochib, erkin hayot izlab Armanistonga kelgan edi. Bu haqda Zamin.uz xabar berdi.

U oilasidagi qat'iy nazoratdan qochishni istab, sochini qisqartirdi, bosh kiyimini yechdi va ijtimoiy tarmoqlarda o‘z suratlarini joylay boshladi. Afsuski, oktabr oyida Yerevanda u ijaraga olingan uyida o‘ldirilgan holda topildi.

Ayshat bilan birga yashagan ayol va erkak voqeadan so‘ng tezda Rossiyaga ketgani ma’lum bo‘ldi. Erkakning Checheniston rahbari Ramzan Qodirovga yaqin shaxs bo‘lishi mumkinligi haqida taxminlar mavjud.

Ayshat Armanistonga kelishidan avval oilasi tomonidan majburan turmushga uzatilgan va doimiy nazorat ostida bo‘lgan. U oddiy va erkin hayot kechirishni orzu qilgan edi.

Uning fojiali o‘limi chechen ayollari xavfsizligiga oid muammolarni yana bir bor kun tartibiga olib chiqdi. Ko‘plab chechen ayollari jamiyat tadbirlarida qatnashishdan va chechen tilida so‘zlashdan o‘zini tiyishga majbur bo‘lmoqda.

Ayshatning o‘limi bu ayollarning xavotir va qo‘rquvini yanada kuchaytirdi.