Xitoyda katta pandalar soni ikki baravar oshdi
So‘nggi o‘n yil ichida Xitoyda katta pandalar soni sezilarli darajada oshdi. Bu haqda Zamin.uz xabar berdi.
Xususan, tutqunlikda saqlanayotgan pandalar populyatsiyasi ikki baravar ko‘payib, 808 taga yetdi. Bu haqda Xitoy O‘rmon va cho‘l xo‘jaligi davlat boshqarmasi boshlig‘i Lyu Goxun Chenduda o‘tkazilgan konferensiyada ma’lum qildi.
Ta’kidlanishicha, 10 yil avval bu ko‘rsatkich 422 tani tashkil qilgan edi. Lyu Goxunning so‘zlariga ko‘ra, bunday yutuq hayvonlarni ko‘paytirish bo‘yicha olib borilgan ilmiy tadqiqotlar va monitoring tizimlarini takomillashtirish natijasida qo‘lga kiritilgan.
Xususan, Xitoy olimlari "kosmos - havo - yer" monitoring tizimidan foydalanib, pandalarni kuzatish va muhofaza qilishni samarali tashkil etmoqda. Shuningdek, 2026-2030 yillarda Xitoy hukumati mamlakat ekotizimlarining biologik xilma-xilligini oshirish, barqarorligini ta’minlash va tabiiy muhitni mustahkamlashga alohida e’tibor qaratishni rejalashtirmoqda.
Katta panda Xitoyning norasmiy ramzi hisoblanadi va davlat tomonidan qat’iy himoya qilinadi. Pandalarning asosiy yashash hududi janubi-sharqiy Sichuan provinsiyasi bo‘lib, u yerda Xitoydagi pandalar populyatsiyasining 70 foizdan ortig‘i istiqomat qiladi.
