Malayziyada suv toshqinlari 11 mingdan ortiq odamni jabrladi
Malayziyaning turli hududlarida kuzatilgan kuchli yomg‘irlar natijasida yuzaga kelgan suv toshqinlari 11 mingdan ortiq odamni og‘ir ahvolga solib qo‘ydi. Bu haqda Zamin.uz xabar berdi.
Ma’lum bo‘lishicha, mamlakatning sharqiy qirg‘oq qismida har yili oktyabrdan martgacha davom etuvchi musson mavsumida bunday tabiiy ofatlar tez-tez sodir bo‘ladi. Har yili minglab odamlar xavfsizlik maqsadida vaqtinchalik boshpanalarga ko‘chiriladi.
Malayziya Tabiiy ofatlarni boshqarish milliy agentligi ma’lumotiga ko‘ra, 24-noyabr kuni ertalab Kedah, Kelantan, Penang, Perak, Perlis, Terengganu va Selangor shtatlarida jami 3 839 oiladan 11 009 kishi jabrlangan. Eng katta zarar Kelantan shtatiga yetgan bo‘lib, bu hududda 8 228 nafar aholi ofatdan aziyat chekkan.
Jabrlanganlar uchun 60 ta vaqtinchalik boshpana tashkil etilgan, ular orasida maktablar, jamoat binolari va ibodatxonalar mavjud. Shuningdek, Perlis shtatining Van Kelian qishlog‘ida 23-noyabr kuni kuchli yomg‘ir oqibatida yuzaga kelgan yer ko‘chkisi qariyb 400 kishini xavf ostida qoldirgan.
Ular vaqtincha baland hududdagi masjidlarga ko‘chirildi. Eslatib o‘tamiz, yaqinda Indoneziyaning Markaziy Yava hududida ham kuchli yog‘ingarchilik oqibatida sodir bo‘lgan ko‘chkilar katta fojiaga sabab bo‘lgandi.
Ushbu voqeada 30 kishi halok bo‘lgan, 40 ga yaqin inson bedarak yo‘qolgani xabar qilingan. Tabiiy ofatlar Janubiy-Sharqiy Osiyoda ko‘p takrorlanayotgani sababli xavfsizlik choralarini kuchaytirish zarurati tobora oshib bormoqda.
