Sobiq prezident o‘g‘li tartibsizliklar rejasida gumon qilinmoqda
Qirg‘iziston Ichki ishlar vazirligi xabariga ko‘ra, mamlakatning sobiq prezidenti Almazbek Atambayevning o‘g‘li Qodirbek Atambayev va uning bir guruh tarafdorlari ommaviy tartibsizliklar uyushtirishga urinishda gumon qilinmoqda. Bu haqda Zamin.uz xabar berdi.
Tergov organlarining ma’lumotlariga ko‘ra, ushbu shaxslar parlament saylovlari natijalari e’lon qilingach, Konstitutsiyaga zid talablar qo‘yish va davlat muassasalarini, jumladan, ma’muriy binolar, teleradiouzatish obyektlari, qurol-yarog‘ omborlari, jazoni ijro etish muassasalarini egallashni rejalashtirgan. O‘tkazilgan tintuvlar chog‘ida gumonlanuvchilardan qurollar, o‘q-dorilar, granatalar, aloqa vositalari, noqonuniy harakatlar rejalari, ularni moliyalashtirishga oid hujjatlar, shuningdek, narkotik moddalar va 150 ming dollar miqdoridagi pul mablag‘lari musodara qilingan.
Qirg‘iziston parlamenti uchun muddatidan oldin saylovlar joriy yilning 30 noyabr kuni o‘tkaziladi. Dastlab bu saylovlar 2026 yil noyabr oyida bo‘lib o‘tishi rejalashtirilgan edi.
Ammo 25 sentyabr kuni amaldagi deputatlar o‘z vakolatlaridan ixtiyoriy ravishda voz kechganliklarini e’lon qilishgan.
