Ozempic Altsgeymerga qarshi kutilgan natijani bermadi
Daniya farmatsevtika kompaniyasi Novo Nordisk aksiyalarining qiymati 10 foizdan ortiqroq pasaydi. Bu haqda Zamin.uz xabar berdi.
Bunga kompaniyaning semizlikka qarshi ishlab chiqarilgan Ozempic preparati Altsgeymer kasalligini sekinlashtirishda kutilgan natijani bermagani haqidagi xabar sabab bo‘ldi. Novo Nordisk tomonidan o‘tkazilgan ikki yirik tadqiqotda to‘rt mingga yaqin bemor ishtirok etdi.
Tadqiqot natijalari shuni ko‘rsatdiki, Ozempic preparatini qabul qilgan bemorlarda Altsgeymer kasalligining rivojlanishi sekinlashmagan. Shunga qaramay, ayrim bemorlarning kasallik bilan bog‘liq ko‘rsatkichlarida yaxshilanish kuzatilgan.
Ilgari olimlar Ozempic preparati nafaqat diabet va vazn kamaytirishda, balki Altsgeymerga qarshi kurashda ham foydali bo‘lishi mumkinligi haqida umid bog‘lagan edi. Novo Nordisk kompaniyasining bosh ilmiy direktori, preparatning muvaffaqiyatga erishish ehtimoli past bo‘lishiga qaramasdan, yangi dori vositalariga bo‘lgan ehtiyoj sabab ushbu tadqiqotlar o‘tkazilganini ta’kidladi.
Shu yil davomida kompaniya aksiyalari qiymati sezilarli darajada pasaygan. Biroq, Novo Nordiskning asosiy raqobatchisi bo‘lgan AQSh kompaniyasi Eli Lilly yaqinda diabet va semizlikka qarshi yangi dorilar ishlab chiqarib, bozor qiymatini 1 trillion dollarga yetkazishga muvaffaq bo‘ldi.
