Mushuk boqish shizofreniya xavfini oshirishi mumkin
Pirogov universiteti klinik psixologi Elizaveta Kulikova mushuk boqish va shizofreniya rivojlanish xavfi o‘rtasida bog‘liqlik bo‘lishi mumkinligini aniqladi. Bu haqda Zamin.uz xabar berdi.
Ushbu ma’lumot universitet matbuot xizmati orqali tarqatilgan. Tadqiqot natijalariga ko‘ra, mushuk egalarida shizofreniya rivojlanish xavfi boshqa uy hayvonlarini boqadigan odamlarga nisbatan ikki barobar yuqori bo‘lishi mumkin.
Buning sababi sifatida Toxoplasma gondii paraziti ko‘rsatilmoqda. Ushbu parazit zararlangan mushuklardan odamlarga yuqishi mumkin.
Ma’lumotlarga ko‘ra, mushuk egalarining 70 foizigacha ushbu parazit tashuvchisi bo‘lishi ehtimoli bor. Mutaxassisning so‘zlariga ko‘ra, zararlangan mushuk bilan aloqa qilish toksoplazmoz kasalligini keltirib chiqarishi mumkin.
Bu kasallik mushaklar, yurak mushaklari, miya va ko‘zlarda kistalar hosil bo‘lishiga sabab bo‘ladi. Miya zararlanganda yallig‘lanish yuzaga keladi va bu dopamin tizimiga ta’sir ko‘rsatadi.
Dopamin darajasining o‘zgarishi esa psixik buzilishlar, jumladan, shizofreniya rivojlanish xavfini oshiradi. Shuningdek, infeksion-yallig‘lanish jarayonida hosil bo‘lgan antitanachalar ham shizofreniya xavfi bilan bog‘liq bo‘lishi mumkin.
Tadqiqot mushuklarning egalarning hissiy holati va xatti-harakatlariga ta’sir ko‘rsatishi ehtimolini ham ko‘rsatdi. Mutaxassislar ayniqsa ruhiy zaiflikka ega odamlar uchun mushuklar stress va asabiy buzilishlarni keltirib chiqaruvchi omil bo‘lishi mumkinligini ta’kidlamoqda.
