Hindiston kinosining afsonasi Dharmendra 89 yoshida vafot etdi
Hindiston kinosining mashhur aktyori Dharmendra, to‘liq ismi Dharmendra Keval Krishan Deol, 89 yoshida hayotdan ko‘z yumdi. Bu haqda Zamin.uz xabar berdi.
Bu haqda "Hindustan Times" nashri xabar berdi. Ma’lum qilinishicha, aktyor salomatligi yomonlashgani sabab ikki hafta avval Mumbaydagi shifoxonaga yotqizilgan.
"Variety" nashri uning nafas olishda qiyinchiliklarga duch kelgani haqida ma’lumot bergan. Hindiston bosh vaziri Narendra Modi aktyorning oilasiga hamdardlik bildirdi.
"Dharmendra Ji o‘limi hind kinosida bir davrning yakunini anglatadi. U har bir roliga o‘ziga xos joziba va chuqurlik olib kirgan ulug‘ aktyor edi," deya ta’kidladi Modi o‘zining ijtimoiy tarmoqdagi sahifasida.
Dharmendra aktyorlik faoliyatini 1960-yillarda boshlagan va o‘zining ijodiy yo‘lida 250 dan ortiq filmlarda rol ijro etgan. O‘zbekistonlik tomoshabinlar uni "Zita va Gita", "Qasos va qonun", "Sevimli Raja" kabi filmlari orqali yaxshi bilishadi.
Shuningdek, u 1980-yillarda "Vijayta Films" prodyuserlik kompaniyasiga asos solgan. Faoliyati davomida u nafaqat aktyor va prodyuser sifatida, balki siyosatchi sifatida ham tanilgan.
2004-2009 yillar davomida Hindiston parlamentining quyi palatasi deputati sifatida faoliyat yuritgan. Dharmendra hind kinosining yorqin yulduzlaridan biri sifatida tarixda o‘chmas iz qoldirdi.
