Ukraina hukumati Rossiya bilan to‘rt yil davom etgan harbiy nizolarni tugatish maqsadida AQSH prezidenti Donald Tramp ma’muriyati tomonidan ilgari surilgan tinchlik rejasini qo‘llab-quvvatlashga rozi bo‘ldi. Bu haqda Zamin.uz xabar berdi.
Bu haqda CBS News AQSH rasmiylariga tayanib xabar berdi. Ma’lum qilinishicha, Ukraina prezidenti maslahatchisi Rustem Umerov va AQSH vakillari o‘rtasida o‘tkazilgan muzokaralarda umumiy kelishuvga erishilgan.
Umerovning so‘zlariga ko‘ra, Ukraina tinchlik rejasini qo‘llab-quvvatlagan, ammo ayrim masalalar bo‘yicha hali qo‘shimcha ishlar olib borilishi kerak. O‘tgan hafta Jenevada AQSH va Yevropa diplomatlari ishtirokida muzokaralar bo‘lib o‘tdi.
Uchrashuv davomida dastlabki 28 banddan 19 tasi qoldirilib, qolgan 9 band olib tashlandi. Bu bandlarning aksariyati Rossiya manfaatlariga xizmat qiluvchi talablar bo‘lib, ular Ukraina va Yevropa tomonlarining e’tirozlariga sabab bo‘lgan.
Rejadan chiqarilgan bandlar haqida batafsil ma’lumot berilmagan bo‘lsa-da, ular orasida eng munozarali qoidalar mavjud edi. Abu-Dabida Rossiya rasmiylari bilan ham muzokaralar o‘tkazilgani ma’lum qilindi.
NATO va AQSHning boshqa ittifoqchilari bu reja hali takomillashtirilishi kerak bo‘lgan poydevor ekanini qayd etishdi. Oq uy muzokaralar natijasida yangilangan tinchlik rejasini ishlab chiqqanini tasdiqladi.
Ukraina tomonining vakili Aleksandr Bevzning ta’kidlashicha, Kiyevning barcha e’tirozlari hisobga olingan. Eng murakkab masalalar bo‘yicha yakuniy qarorlar Tramp va Zelenskiy darajasida muhokama qilinadi.
Shuningdek, Rossiya manfaatlariga mos keluvchi ko‘plab talablar reja loyihasidan chiqarib tashlangan yoki yumshatilgan.
