Yangi Zelandiya 2050-yilgacha yovvoyi mushuklarni yo‘q qiladi
Yangi Zelandiya hukumati 2050-yilgacha yovvoyi mushuklarni butunlay yo‘q qilish bo‘yicha yangi rejani amalga oshirishni boshladi. Bu haqda Zamin.uz xabar berdi.
Bu tashabbus "Yirtqichlarsiz – 2050" dasturi doirasida amalga oshirilmoqda va mamlakatning tabiatni muhofaza qilish bo‘yicha muhim qadamlaridan biri sifatida baholanmoqda. Dastur ilgari kalamushlar, stoatlar, ferretlar, lasalar va opossumlarni yo‘q qilishni o‘z ichiga olgan bo‘lsa, endilikda yovvoyi mushuklar ham ro‘yxatga kiritildi.
Yovvoyi mushuklar Yangi Zelandiyaga ilk bor yevropaliklar orqali kirib kelgan. Keyinchalik ular uy mushuklarining yovvoyilashishi natijasida shakllangan.
Ushbu mushuklar har yili taxminan 1,12 million qushni o‘ldiradi, bu esa ko‘plab mahalliy qush turlarining yo‘q bo‘lib ketishiga sabab bo‘lmoqda. Bugungi kunda mamlakatda 2,5 milliondan ortiq yovvoyi mushuk borligi qayd etilgan va ularning ayrim hududlardagi ekologik ta’siri falokat darajasiga yetgan.
Hukumat ayrim mintaqalarda mushuklarga qarshi tadbirlarni boshlab yuborgan. Endi esa yanada keng ko‘lamli va puxta strategiya ishlab chiqilmoqda.
Masalan, Styuart oroli va Ruapexu hududlarida ko‘rshapalaklar populyatsiyasining kamayishida yovvoyi mushuklarning roli katta ekanligi aniqlangan. Mutaxassislarning fikriga ko‘ra, bioxilma-xillikni tiklash uchun mushuklarni nazorat qilish muhim ahamiyatga ega.
Avvaliga jamoatchilik bu tashabbusga keskin qarshilik ko‘rsatgan bo‘lsa-da, bugungi kunda aholining 90 foizi yovvoyi mushuklarni ro‘yxatga kiritishni qo‘llab-quvvatlamoqda. Uy mushuklari ushbu dasturning ta’sir doirasidan tashqarida qolgan bo‘lsa-da, SPCA va Predator Free Trust kabi tashkilotlar uy mushuklarini mikrochiplash, sterilizatsiya qilish va uy sharoitida saqlash kabi choralarni taklif etmoqda.
Mazkur tashabbus Yangi Zelandiya uchun nafaqat ekologik zarurat, balki noyob qushlar va hayvonot dunyosini saqlab qolish yo‘lidagi muhim qadam sifatida qaralmoqda.
