Bokuda ayol haydovchilar avtobus boshqarishni boshladi
Ozarbayjonning poytaxti Boku shahrida 24-noyabrdan boshlab ayol haydovchilar yo‘lovchi avtobuslarni boshqarishni boshladi. Bu haqda Zamin.uz xabar berdi.
Bu yangilik mamlakat jamoat transporti tizimida ayollarning ishtirokini kengaytirishga qaratilgan muhim qadam sifatida baholanmoqda. Dastlabki bosqichda ayol haydovchilar tajribali murabbiylar nazorati ostida ishlaydi.
Ozarbayjon Yerusti transporti agentligi (AYNA) tomonidan maxsus tayyorgarlik dasturi ishlab chiqilgan bo‘lib, unda nomzodlarga nazariy bilimlar hamda amaliy mashg‘ulotlar o‘tkazilgan. Ushbu dastur haydovchilik ko‘nikmalaridan tashqari xizmat ko‘rsatish madaniyati, xavfsizlik qoidalari va turli yo‘l sharoitlarida to‘g‘ri harakatlanish bo‘yicha bilimlarni o‘z ichiga oladi.
Mashg‘ulot davomida ayollar manyovr qilish, avtobusni to‘xtatish, parkovka qilish va murakkab yo‘llarda boshqarish bo‘yicha amaliy tajribaga ega bo‘ldi. Tayyorlov jarayonini muvaffaqiyatli yakunlagan nomzodlar maxsus marshrutlarda mustaqil haydash sinovlaridan o‘tdi.
Shuningdek, ular tibbiy ko‘rik, psixologik baholash va xavfsizlik talablariga moslik bo‘yicha tekshiruvlardan ham o‘tgan. Natijada barcha talablarni bajargan ayollar BakuBus kompaniyasida haydovchi sifatida ish boshladi.
Boku shahrida ayol haydovchilarning jamoat transportida faoliyat yuritishi gender tengligini ta’minlash va sohani rivojlantirish yo‘lida muhim qadam bo‘lib xizmat qilmoqda.
