Musiqa jarrohlikda narkoz miqdorini kamaytiradi
Hindistonda olib borilgan yangi ilmiy tadqiqot jarrohlik amaliyoti davomida instrumental musiqa tinglash bemorlarda narkozga bo‘lgan ehtiyojni sezilarli darajada kamaytirishi mumkinligini isbotladi. Bu haqda Zamin.uz xabar berdi.
Ushbu tadqiqot Dehlidagi Lok Nayak shifoxonasi va Maulana Azad tibbiyot kollejida o‘tkazilib, unda o‘t pufagini olib tashlash operatsiyasiga (laparoskopik xolesistektomiya) jalb qilingan 56 nafar bemor ishtirok etdi. Tadqiqot 2023-yil martidan 2024-yil yanvarigacha davom etgan bo‘lib, uning asosiy maqsadi narkoz miqdorini kamaytirish va jarrohlik oldidagi stress darajasini pasaytirish edi.
Bemorlar ikkita guruhga bo‘lindi. Ulardan bir guruh operatsiya vaqtida quloqchin orqali hind nayi yoki pianinoda ijro etilgan tinchlantiruvchi musiqalarni tingladi.
Barcha bemorlarga bir xil narkoz vositalari qo‘llangan bo‘lsa-da, musiqa tinglagan guruhda narkoz miqdori ancha kam talab qilingan. Tadqiqot natijalariga ko‘ra, musiqa tinglagan bemorlar asosiy narkoz vositasi — propofoldan kamroq foydalanishgan.
Ularning har bir kilogramm vazniga soatiga o‘rtacha 6,7 milligramm propofol qo‘llangan bo‘lsa, nazorat guruhida bu ko‘rsatkich 7,86 milligrammni tashkil etgan. Bundan tashqari, musiqa tinglagan bemorlarda kuchli og‘riq qoldiruvchi fentanilga ehtiyoj tug‘ilmagan.
Shuningdek, musiqa tinglagan guruhda stress darajasi ham past bo‘lgani aniqlangan. Qondagi kortizol miqdori musiqa tinglamagan guruhda o‘rtacha 536 millimolni tashkil etgan bo‘lsa, musiqa tinglagan guruhda bu ko‘rsatkich 417 millimolga teng bo‘lgan.
Bu esa organizmning operatsiyaga kuchli stress bilan javob bermaganini ko‘rsatadi. Tadqiqot natijalari shuni ko‘rsatdiki, musiqa eshitgan bemorlar narkozdan yengilroq uyg‘onishgan va tiklanish jarayoni ham tezroq kechgan.
Mutaxassislar musiqani arzon, xavfsiz va klinikada qo‘llash uchun qulay bo‘lgan qo‘shimcha terapiya sifatida baholashmoqda. Ushbu yondashuv kelgusida jarrohlik amaliyotlarida keng qo‘llanilishi mumkinligi ta’kidlanmoqda.
