Tailand janubida bir necha kundan beri davom etayotgan kuchli yomg‘irlar aholiga jiddiy muammo tug‘dirmoqda. Bu haqda Zamin.uz xabar berdi.
25-noyabr kuni e’lon qilingan ma’lumotlarga ko‘ra, Xat Yai shahri va unga yaqin hududlar suv toshqinlari ta’sirida qolgan. Ushbu holat haqida “France24” nashri xabar berdi.
Hukumat Songxla provinsiyasida favqulodda holat e’lon qilgan. Meteorologiya xizmati yog‘ingarchilik davom etishi va toshqinlar kuchayishi mumkinligini ogohlantirgan.
Tabiiy ofatlar departamentining ma’lumotiga ko‘ra, so‘nggi kunlarda yog‘gan kuchli yomg‘irlar Xat Yai va janubiy hududlarning katta qismini suvga to‘ldirgan. To‘rtta provinsiyada yuz bergan toshqinlar oqibatida 13 kishi halok bo‘lgan.
Mahalliy telekanallarda qutqaruvchilar qayiq, skuter va harbiy texnikalar yordamida odamlarni xavfsiz joylarga ko‘chirayotgani aks etgan lavhalar namoyish etilmoqda. 20-noyabrdan boshlab Songxla shahrida 1 200 dan ortiq fuqaro o‘z uylarini tark etishga majbur bo‘lgan.
Bosh vazir Anutin Charnvirakul qutqaruv ishlarini tezlashtirish uchun qo‘shimcha texnika va qayiqlarni safarbar etish haqida ko‘rsatma bergan. Tailandda odatda musson mavsumi iyun–sentyabr oylarida bo‘ladi.
Ammo iqlim o‘zgarishi sababli noodatiy kuchli yomg‘irlar kuzatilmoqda va bu holat vaziyatni oldindan bashorat qilishni yanada murakkablashtirmoqda.
